Türkmeniz Birleşen Milletler Siwilizasiýasy Forumynda
Resmi habarlar
Turkmenistanyň Daşary işler ministrliginiň habar bermegine görä, daşary işler ministriniň orunbasary Ahmet Gurbanowyň ýolbaşçylygyndaky türkmen wekiliýeti Er-Riýadda geçirilen BMG-niň Siwilizasiýalar Alyansynyň (UNAOC) 11-nji Global forumyna gatnaşdy.
Çäre «UNAOC: Adamzat üçin dialogyň ýigrimi ýyly — köppolýarly dünýäde özara hormat goýmagyň we düşünişmegiň täze eýýamyny gurmak» şygary astynda geçirildi. Forumda dürli ýurtlardan döwlet wekilleri, ýaşlar we zenanlar hereketleriniň liderleri, jemgyýetçilik guramalarynyň hem-de köpçülikleýin habar beriş serişdeleriniň wekilleri ýygnanyp, global parahatçylygy berkitmegiň we medeniýetara gatnaşyklary ösdürmegiň ýollaryny ara alyp maslahatlaşdylar.
Forumda çykyş eden Ahmet Gurbanow halkara giňişliginde ynamyň pese gaçýan we düşünişmezlikleriň artýan döwründe BMG-niň Siwilizasiýalar Alyansynyň ornunyň barha ýokarlanýandygyny belledi. Ol UNAOC-nyň alyp barýan işleriniň Türkmenistanyň 2025-nji ýyly Halkara parahatçylyk we ynanyşmak ýyly diýip yglan etmek baradaky başlangyjy bilen sazlaşýandygyny nygtady.
Şunuň bilen baglylykda, ol Türkmenistanyň BMG-niň Siwilizasiýalar Alyansy bilen bilelikde alyp barmagy teklip edýän hyzmatdaşlyk ugurlaryny beýan etdi. Olaryň hatarynda parahatçylyk medeniýetini we araçylygy ösdürmek, ynsanperwer we medeniýetara dialogy giňeltmek, parahatçylyk döredijilik hyzmatdaşlygy üçin sebit we ýaşlar meýdançalaryny döretmek, şeýle hem halklaryň arasynda ynamy we özara düşünişmegi pugtalandyrmak ýaly başlangyçlar bar diýlip, ministrlikde habar berdiler.