Hytaýyň paýtagtynda Türkmenistanyň 2026-njy ýyl üçin esasy şygary görkezildi
Içki habarlar
Hytaýdaky Türkmenistanyň ilçihanasy 2026-njy ýylyň şygary "Garaşsyz, hemişelik Bitarap Türkmenistan – maksada okgunly ganantly bedewleriň Watany" bilen baglanyşykly çäre geçirildi. Çäräniň çäginde Prezident Serdar Berdimuhamedowyň "Türkmenistanyň Bitaraplygy – parahatçylygyň we ynanyşmagyň şöhratly ýoly" atly kitaby görkezildi.
Türkmenistanyň Daşary işler ministrliginiň habar bermegine görä, çärä Hytaý Halk Respublikasynyň Atçylyk assosiasiýasynyň Baş sekretary, Türkmen-hytaý medeni merkeziniň wekilleri, Psearcher we Lookwe neşirleriniň baş redaktorlary we žurnalistleri, şeýle hem Pekin şäheriniň ýokary okuw jaýlarynyň mugallymlary we şol ýokary okuw jaýlarynda bilim alýan türkmen talyplary gatnaşdylar.
Türkmenistanyň ilçisi Parahat Durdyýew çykyşynda gatnaşyjylara 2026-njy ýylyň "Garaşsyz, hemişelik Bitarap Türkmenistan – maksada okgunly ganantly bedewleriň Watany" diýlip yglan edilmegi barada maglumat berdi, şeýle hem gatnaşyjylar üçin "Türkmenistanyň Bitaraplygy – parahatçylygyň we ynanyşmagyň şöhratly ýoly" kitabynyň esasy mazmunyny we ähmiýetini açdy.
Hytaýly hyzmatdaşlar öz çykyşlarynda türkmen-hytaý gatnaşyklarynyň ýokary derejesini we depginli ösüşini, Türkmenistanyň uly üstünliklerini bellediler.
Çäräniň çäginde Hytaý Halk Respublikasynyň Oba hojalyk ylymlary akademiýasynyň we Içki Mongoliýa uniwersitetiniň biohimiýa we molekulýar biologiýa boýunşa hünärmeni Weýýu Huakaýýuwa Halkara alabaý assosiasiýasyna agza bolmak barada şahadatnama dabaraly ýagdaýda gowşuryldy.